Instagram actualiza a súa aplicación móbil e renova o seu logotipo

A aplicación líder para compartir fotografías dende o móbil, Instagram, recibiu hoxe unha actualización radical que, sen mudar o funcionamento da ferramenta, renovou tanto a súa aparencia gráfica como a súa icona, de xeito que semella unha aplicación móbil totalmente diferente (que ao non mudar nas mecánicas de uso non debería supor ningún trauma para o usuario).
Ao gozar agora dun deseño máis simple, cos elementos de interface de menor tamaño, dáse un maior protagonismo ás fotografías e aos vídeos, sen modificar as mecánicas de navegación.
A partires de agora as aplicacións da familia de Instagram (como Layaout, Boomerang e Hyperlapse) comparten iconas deseñadas mantendo a súa forma básica, pero debuxándose nun gradiente multicor que será o novo selo da marca.
Este cambio é moito máis importante do que poderiamos pensar inicialmente, xa que ao non limitarse á aplicación móbil, e chagar á icona que a representa, obrigará tamén a que infinidade de páxinas webs nas que empregan o vello logotipo para ligar a súa conta de Instagram teñan que mudar esa imaxe nalgún momento, o que claramente non acontecerá a curto prazo.