Integran µTorrent no cliente oficial de BitTorrent

BitTorrent renova a súa aplicación informática oficial, de xeito que o BitTorrent 6.0 será realmente o popular µTorrent (adquirido hai pouco por BitTorrent Inc.), que revalida así a súa posición destacada entre tódolos clientes de BitTorrent.
A versión de proba de BitTorrent 6.0 non suporá a desaparición de µTorrent, que continuará a existir de xeito independente, e que podería contar cunha versión para Mac OS X nas vindeiras semanas (actualmente só ten versión para Windows).
Con este cambio no cliente oficial de BitTorrent (que é incompatible coas descargas en curso na versión 5, pois é unha renovación absoluta da aplicación) é así unha aplicación máis lixeira (carga menos a memoria e o procesador do ordenador no que se executa), descubre conexións locais, permite múltiples descargas simultáneas, ten un programador configurable do largo de banda, permite limitar a velocidade dos ficheiros de xeito independente e global, permite retomar rapidamente as transferencias interrompidas, soporta RSS e pode funcionar en ausencia de rastrexadores (DHT).

Control remoto dos torrents

Outro detalle que está a causar sensación no µTorrent é a publicación na Rede dunha versión de proba do WebUI, que sería unha interface de uso remoto que permitiría a xestión de descargas mediante un navegador web. Esta funcionalidade resulta moi atractiva para os usuarios que queren controlar as descargas do seu ordenador doméstico dende o traballo ou mesmo en domicilios con varios equipos de xeito que se poden centralizar as descargas nun único ordenador.
O WebUI permite incluso o control dende teléfonos móbiles, e sorprende que mesmo desenvolveran unha extensión do Firefox que permite a visualización das velocidades de descarga e subida do µTorrent dende a barra de estado do navegador.