LG sube ao carro da nube

LG Electronics anunciou hoxe que mañá mesmo vai botar a andar en fase de probas o seu servizo LG Cloud, que busca levar todos os seus contidos dixitais mediante streaming a distintos dispositivos electrónicos no que supón unha oferta multipantalla inicialmente incluirá a smartphones con Android, ordenadores persoais e televisores conectados (sen limitarse á popular liña LG Cinema 3D).
Para poder gozar deste novo servizo será preciso descargar a aplicación de LG Cloud de Google Play (en móbiles), da tenda de aplicacións LG SmartWorld (en televisores) ou da súa páxina web (en ordenadores, nos que, aparte de cunha aplicación cliente, tamén sería posible acceder ao servizo vía web), de xeito que as fotografías e vídeos captadas co móbil sincronizaranse de xeito automático na nube para poder velos no ordenador ou no televisor en calquera momento, podendo incluso editarse os vídeos no PC para despois poder ver a versión modificada incluso no móbil.
O proceso de conversión de contidos para a súa reprodución a través de streaming realizarase nos servidores de LG CLoud e non nos dispositivos conectados, o que permite obviar os típicos problemas de formatos de vídeo e permitindo que o usuario esqueza tal atranco.
LG Cloud tamén é compatible con contidos en 3D, de xeito que os vídeos gravados en 3D poderán levarse á nube para logo visualizalos nun televisor LG Cinema 3D.
O presidente e director xeral de LG, Havis Kwon, asegurou que “os consumidores de mañá non queren ir a unha nube para a música, a outra nube para o vídeo, outra localización para as fotografías e outra nube máis para os seus documentos ofimáticos. Ao final a nosa solución é facer a vida máis cómoda”.
LG Cloud ofrecerá almacenamento en liña de balde, que poderá completarse cun servizo de pagamento, con condicións que variarán en cada mercado.