Lanzan a última beta do Democracy Player

A afluencia de vídeos na Rede nace tanto de servizos de publicación (YouTube, Google Video...) coma de plataformas P2P, existindo distintos formatos para os vídeos, e dunha certa dificultade para o seu seguimento, polo que crearon un reprodutor multimedia chamado a xuntar todos elementos: Democracy.
Así, a xente que ten dificultades para reproducir os máis habituais formatos de vídeo (Quicktime, WMV, MPEG, AVI, Xvid e mesmo clips en Flash), os que seguen programas de televisión que se difunden a través da Internet (videoblogs ou outras descargas de vídeo que se poidan seguir mediante fluxos RSS), os que queiran descargar clips de YouTube, Google Vídeo, Revver, DailyMotion e outros servizos de vídeo, que queiran ver vídeos en alta definición a pantalla completa e que gusten das descargas mediante tecnoloxía BitTorrent poden satisfacer tódalas súas demandas nunha única aplicación que vén de estrear a súa última versión de proba, polo que o Democracy Player presenta a súa última entrega, pois nas vindeiras semanas transformarase nunha versión definitiva que se chamará Miro Player e que será unha das ferramentas mellor valoradas polos amantes do vídeo a través da Internet.
O actual reprodutor está dispoñible para Mac OS X, Linux e Windows, e dende a súa interface permite a consulta de moitas fontes de vídeos ás que se pode un subscribir de xeito que permitan unha especie de televisión á carta para o usuario, podendo automatizarse incluso a vixencia dos vídeos (que se descargarían automaticamente e mesmo se borrarían ó pasar o tempo indicado).
A cantidade de contidos é abraiante, podéndose acceder a resumos de informativos de varias canles norteamericanas, fragmentos de programas de televisión, multitude de videoblogs, trailers de estreas cinematográficas, vídeos musicais... que se poden reproducir a pantalla completa, sen ter que complicarse con formatos ou outras aplicacións informáticas. Unha auténtica televisión á carta baseada en servizos legais e de balde, aínda que coa mágoa de que a meirande parte dos vídeos estean en inglés.