Lenovo levará 5 millóns ordenadores de baixo custe ao rural chinés
venres, 6 de marzo do 2009
A firma chinesa de informática Lenovo, vén
de “poñerse serio” coa causa común de
rachar a fenda dixital existente no seu país dunha vez por todas e vén de
anunciar a venda de “cinco millóns de
ordenadores en zonas rurais nos vindeiros 3 anos”.
Así o vén de facer público a axencia
oficial Xinhua, onde tamén se afirma que os prezos destes dispositivos roldarán
os 350 euros, unha cifra que os máis de 700 millóns de campesiños chineses
poderían afrontar con maior ou menor dificultade.
Os responsables da iniciativa crearon ata 15 modelos de
ordenadores diferentes, segundo afirma o vicepresidente da compañía, Xia Li, “especialmente deseñados para o mercado
rural”, que poden facer posible que a fenda dixital existente no país
asiático entre o campo e a cidade, se reduza ao máximo.
O Ministerio de Industria e Tecnoloxía da Información de
China vaticinou que, a pesar da crise, “as
empresas tecnolóxicas do país aumentarán a súa produción de ordenadores un 10
por cento este ano”, ata chegar aos 150 millóns de unidades.
