Lenovo non acudirá ao Mobile World Congress

Tras o anuncio de que Sony non estaría presente fisicamente no Mobile World Congress de Barcelona, que comezará o 28 de febreiro, chega agora outro grande fabricante, Lenovo, e tamén advirte de que, ante a evolución actual da COVID-19 optan por participar na vindeira edición do Mobile World Congress de xeito totalmente virtual.
Aínda que en Europa os móbiles de Lenovo non están moi presentes coa súa marca, cómpre lembrar que a marca Motorola é da súa propiedade, polo que si é un fabricante bastante recoñecido, conservando aínda moita forzan en varios mercados latino americanos.
Parece bastante probable que nas vindeiras semanas a meirande parte das grandes compañías realicen comunicados semellantes, de xeito que o Mobile World Congress non chegará a cancelarse presencialmente, pero as presentacións de peso terán lugar en eventos en liña, dun xeito semellante ao que aconteceu hai poucas semanas co CES de Las Vegas, que tivo un grande impacto mediático pese a que a meirande parte das grandes compañías non estiveron presentes fisicamente.