Liberan a primeira versión de proba da versión móbil do Firefox para Windows Mobile

A versión pre-alpha de Fennec está preparada para funcionar nun HTC Touch Pro

Fennec, o proxecto que está a desenvolver a versión móbil do navegador web Firefox, liberou a súa primeira versión pre-alpha para Windows Mobile (descargable nun instalador CAB), que polo momento é compatible con terminal HTC Touch Pro (aínda que é probable que opere sen problemas con outros dispositivos que conten cunha resolución gráfica suficiente).
Esta versión do navegador permite que os usuarios máis adiantados poidan achegarse á súa interface e poidan detectar fallos así como facer comentarios construtivos sobre o mesmo, para axudar a depurar o produto final para o que aínda non hai unha data marcada (aínda que é de agardar un goteo de versións de proba nos vindeiros meses). O programa está preparado para funcionar cunha resolución de pantalla de 640 x 480 e teclado, de aí que se pense directamente no HTC Touch Pro para probalo, pois poucos son os teléfonos intelixentes con Windows Mobile que combinan tales prestacións (aínda que existen algúns coma o XPERIA X1 ou Toshiba Portégé G910, que incluso contan con pantallas de maior resolución, nos que tamén podería funcionar esta versión inmatura de Fennec).
En versións posteriores de Fennec buscarán opcións alternativas para introducir os enderezos das webs a visitar (¿funcionará con resolucións máis reducidas?), pero os usuarios de smartphones con teclado físico poden botar así un ollo a un navegador que podería ter moito éxito no futuro.