Lugo achega 14 novos cursos no seu Edificio de Novas Tecnoloxías
luns, 9 de outubro do 2017
Quen queira formación tecnolóxica en Lugo, vaina
ter. E sen necesidade de ir lonxe (a cidadanía ten no centro da
cidade, en pleno casco vello, un centro formativo e divulgativo
especialmente remodelado para o devandito cometido: o Edificio de
Novas Tecnoloxías, de
cuxa apertura e de cuxos
primeiros obradoiros falamos polo miúdo en Código Cero). Pois
ben, respecto da continuidade desta liña de difusión de contidos e
coñecemento, a concelleira de Concello e Cidadanía, Rosana Rielo,
presentou este 6 de outubro os cursos do novo programa formativo
Tecnoloxíza-T!, que se impartirá no dito centro da man do
Concello. Trátase
de 210 prazas totalmente de balde artelladas en 14 cursos dirixidos a
públicos de todas as idades. Desenvolveranse dende o 21 de
outubro ao 22 de decembro.
Na cita cos medios, Rosana Rielo fixo saber que
“estes cursos permiten coñecer as vantaxes das novas tecnoloxías,
mellorar as competencias dixitais e impulsar o desenvolvemento
persoal no ámbito da tecnoloxía”. Ademais, animou a toda a
cidadanía “para que participe nestes cursos, que en edicións
anteriores tiveron moita demanda”.
Entre as distintas alternativas de accións
formativas que ofrece o Concello atópanse facturación electrónica,
iniciación ás redes sociais, deseño web, utilización do
smartphone, trámites bancarios en liña, mercadotecnia
dixital, comunicación dixital, posicionamento web, emprego do
Whatsapp, creación de aplicacións móbiles, Internet
segura, uso da tableta, introdución á programación e retoques
fotográficos.
Rielo tamén lembrou que para inscribirse nalgún
destes cursos é necesario achegarse ao Edificio de Novas
Tecnoloxías, aberto en horario de luns a venres, de 10:00 a 13:00
horas, e de 17:00 a 21:00 horas, e os sábados de 17:00 a 21:00
horas. As persoas interesadas poderán formalizar a matrícula ata as
20:00 horas do día de peche da inscrición, anterior ao inicio do
curso, data distinta para cada unha das accións. A listaxe de
persoas admitidas poderase consultar en www.lugo.gal,
no propio centro, ou a través do teléfono de atención cidadá 010.
Será necesario asistir a un 80% das horas para pode recibir o
diploma. O programa e as bases de participación nestes cursos están
dispoñíbeis na web municipal www.lugo.gal.