Lugo acolle a nova edición galega da First Lego League
martes, 18 de novembro do 2008
A edición deste
ano da competición internacional de robótica para escolares First
Lego League tocará de cheo a Galicia, máis concretamente á cidade de
Lugo, que ao longo do día 23 de novembro dará acollida a un total de 16 equipos
formados por escolares de entre 10 e 16 anos chegados de todo o país cos seus
deseños de robots.
De aquí sairán
tres equipos que acudirán á Gran Final España en Barcelona, o vindeiro 1 de
febreiro de 2008, onde se enfrontarán aos finalistas dos outros 6 torneos
clasificatorios que terán lugar en diferentes cidades españolas.
Nesta edición da First Lego League, que se celebra no
noso país dende o ano 1988, o evento versará sobre a xestión e conservación do
clima, polo que os estudantes deberán fabricar un robot que lles axuda a “salvar o medio ambiente”.
Nesta competición
os escolares traballan co seu “adestrador”
para construír e programar un robot que resolva o desafío anual mediante retos
da vida real. Tamén deben investigar en Internet, conversar con científicos,
visitar bibliotecas e librerías e desenvolver unha presentación do seu
proxecto.
Grazas a esta
iniciativa, sinalan os organizadores, os rapaces desenvolven habilidades creativas,
pensamento analítico, comunicación e traballo en equipo, ademais de adquirir
coñecementos técnicos e científicos.
Os participantes
únense en equipos de entre 4 e 10 membros e contan co apoio dun titor adulto
para preparar, durante unhas oito semanas, a súa participación no torneo. Nesta
ocasión, o desafío é Conexións Climáticas,
para o cal os nenos e nenas participantes deberán investigar sobre o modo de
xestionar e conservar o medio ambiente, e propoñer solucións globais para a súa
recuperación.
Os gañadores do
torneo en España poderán escoller entre dúas opcións: competir no Open European Championship contra os
mellores equipos europeos ou asistir como convidados en abril ao World Festival en Atlanta (EEUU), onde
se reúnen e intercambian experiencias tódolos participantes das diferentes
competicións de robótica que First ampara a nivel mundial.
Este ano están
inscritos máis de 110.000 nenos de 43 países.