Meteogalicia estrea novo radar meteorolóxico e páxina web máis accesible

A Consellaría de Medio Ambiente está que non para estes días: logo de presentar unha nova ferramenta en liña para conservar a nosa riqueza ambiental, vén agora de presentar un radar meteorolóxico que incrementará ata nun 200 por cento a capacidade de predición (algo que, sobre todo nos días pasados nos tería evitado moitos desgustos a todas e tódolos galegos) e que estará situado no concello de Cuntis.
O director de Meteogalicia, Vicente Pérez Muñuzuri, explicou perante os medios de comunicación presentes na rolda de prensa, que esta ferramenta “permitirá, por exemplo, determinar o lugar, a cantidade e o tipo de precipitacións que caerán” ou “a cantidade e tipo de neve que caerá nunha localidade determinada”.
Este sistema de prevención de riscos completarase, asemade, cunha rede de raios que conta xa con 4 dispositivos, un en cada provincia. Deste xeito, os meteorólogos poderán saber onde caen os raios e por onde se vai mover unha treboada, entre outras cousas.
Asemade, Meteogalicia estreou recentemente dependencias en Santiago de Compostela e ten previsto mellorar a páxina web para facela máis accesible (con varias posibilidades de idioma) e personalizable para salientar os contidos que lle interesen a cada cidadán.
Nos vindeiros días, os responsables da aplicación veñen de anunciar que os internautas que o desexen, “poderán facer, na páxina, suxestións para mellorar os contidos que ofrece a entidade pública por Internet” e deixar os comentarios que vexan oportunos para mellorar a aplicación.
Entre as melloras para o servizo meteorolóxico que se acadan co novo radar de Cuntis, destacan as seguintes:
• Mellora na estimación cuantitativa das intensidades de choiva e neve.
• Discriminación do tipo de precipitación: choiva, neve e sarabia.
• Identificación, dentro dos sistemas frontais, do tipo de meteoro e o seu tamaño.
• Identificación de sistemas de precipitación electricamente activos.
• Axuda no diagnóstico, é dicir, en proporcionar unha descrición cuantitativa das condicións actuais da atmosfera.
• Nowcasting, predición de forma precisa de eventos meteorolóxicos no prazo de 2-3 horas. Neste prazo o radar proporciona unha información máis precisa que a achegada polos modelos numéricos.
• Achega de datos que empregan na súa asimilación os modelos numéricos. As variables máis importantes empregadas son: o campo de ventos horizontais e o contido en auga (incluíndo a fase).
• Obtención dunha climatoloxía dos fenómenos observados polo radar, o que axuda na planificación e toma de decisións.
• Permite outros usos distintos ao meteorolóxico, como é o estudo da migración de aves e o desprazamento de insectos, os cales poden causar dano ás colleitas, investigación…