Microsoft estrea este martes un completo servizo musical baseado na nube
luns, 15 de outubro do 2012
De cara ao lanzamento oficial de Windows 8 o vindeiro día 26, este
martes Microsoft estrea Xbox Music, un servizo musical integral que
combinará os mellores aspectos da radio en streaming
de balde, os servizos de subscrición musical e a compra de música, todo nun
paquete que estrearase na Xbox 360 para saltar despois ao PC.
Con Xbox Music preténdese unificar os moitos servizos de música que hai na
actualidade, de xeito que a mesma plataforma permite reproducir música de
distintos xeitos e dende diversos dispositivos, no que en palabras de Yusuf
Mehdi, vice presidente da división de Lecer Interactivo de Microsoft, será “un servizo simple e doado de usar sobre o
que engadiremos valor facéndoo fermoso, e que funciona en todos os dispositivos”.
O catálogo musical desta plataforma será un dos máis amplos do mercado, con 30
millóns de cancións, polo que será ideal tanto para atopar os nosos temas
favoritos como para descubrir nova música.
Xbox Music permitirá escoitar cancións soltas ou discos completos nun tablet ou
ordenador con Windows 8, crear mesturas musicais e listaxes de reprodución, crear
emisoras de radio por Internet baseadas en intérpretes, escoitar música elixida
mediante patróns (Smart DJ) permitindo que sempre sexa posible saltar un tema
do que non gustemos e mercar os temas que queiramos posuír. Permitirá escoitar
música a través da Internet de balde con publicidade en ordenadores e tablets,
contando tamén coa opción de contratar unha servizo de pagamento por 9,99
dólares/mes que permite tomar a música da nube e gozar da mesma en móbiles con
Windows Phone 8 (e máis adiante tamén a través de aplicacións para Android e
iOS) e dende a Xbox 360. Podiamos considerar que sería como a fusión entre
Spotify e iTunes, pero dispoñible dende máis dispositivos, no que pode ser só o
principio do que Microsoft prepara nesta liña (que podería chegar tamén a
películas e series de televisión).
Xbox Music presentado en vídeo