Microsoft permitirá alugar vídeos a través da Xbox 360 tanto en España como en Italia

Microsoft realizou unha presentación na discoteca Pachá de Madrid para dar a coñecer á nova interface da Xbox 360, e durante a mesma o director xeral de Xbox LIVE, Jerry Johnson, anunciou que «o 19 de novembro, cando lancemos a nova Xbox Experience, imos presentar un novo bazar de vídeo para España e Italia. Deste xeito non só haberá contido relacionado cos xogos, senón que tamén o haberá no ámbito do lecer e o cine».
Entendemos así que o servizo de aluguer de películas que lanzará Microsoft coa colaboración de Netflix nos EE.UU. vai ter réplicas europeas, o que é toda unha sorpresa xa que ata o momento nin sequera iTunes conta con algo semellante (pese a que leva moito tempo operando).
Deste xeito, a Xbox 360 se poderá empregar tanto para xogar coma para reproducir películas dende soportes físicos ou a través de descarga dixital, faltando agora que se confirmen as condicións do servizo, do que se espera que permita elixir entre definición estándar e alta definición, entendéndose que se limitará a contidos protexidos con tecnoloxía DRM para permitir a súa reprodución só durante un tempo limitado e que, de seguir a mesma política que nos EE.UU., só estaría dispoñible para os usuarios subscritos a Xbox LIVE Gold (pois Microsoft prefire restrinxir o acceso a usuario de pago, xa que o acceso a trailers e outros contidos audiovisuais supoñen un importante gasto para a compañía de querer manter o nivel de calidade ao que Xbox LIVE ten acostumado ao seu público).