Montserrat Rigall impartirá un curso na USC sobre a creación de noticias con dispositivos móbiles

O proxecto Valcomm da USC (Facultade de Comunicación), o Grupo Novos Medios, a Cátedra RTVE USC, o grupo de innovación docente IDESVIR e a Cátedra CIRCOM organiza este mes de abril un curso práctico de Mobile Journalism (MoJo) con Monsterrat Rigall, xornalista e divulgadora de RTVE, experta en nova comunicación e Intelixencia Artificial. A cita xirará arredor da creación de noticias con dispositivos móbiles.
Celebrarase na Facultade de Comunicación da Universidade de Santiago de Compostela os próximos días 29 e 30 de abril. Na cita, Rigall afondará como dixemos nos novos xeitos de crear contidos xornalísticos e nas diferentes ferramentas e aplicacións das que poden botar man as e os profesionais para optimizar e posibilitar esta nova práctica profesional.
Esta iniciativa será gratuíta para as 20 persoas participantes, que recibirán un certificado de participación. As persoas candidatas deberán ser graduadas en xornalismo e serán seleccionadas por orde de inscrición. As matriculacións poden facerse a través da Rede. O único requisito técnico necesario será o acudir ás sesións con smartphones con cámara integrada e conexión a internet. Con todo, as persoas asistentes poderán empregar libremente calquera ferramenta que mellore a calidade da gravación, como trípodes, estabilizadores de imaxe ou micrófonos de solapa adaptados a móbiles.
Na primeira das xornadas, Rigall profundará nos conceptos e consellos fundamentais para executar prácticas de xornalismo móbil de calidade, e concretará diferentes ferramentas e aplicacións útiles para a realización de MoJo. Na sesión de tarde, o alumnado dispoñerá de tempo libre para gravar e producir as súas propias pezas, que serán visionadas, revisadas e optimizadas na xornada do martes, día 30 de abril.

Programa curso MoJo

29 de abril
9:00 a 13:00: Sesión formativa sobre Mobile Journalism e aplicacións MoJo
Xornada de tarde: sesión libre para a elaboración de pezas informativas MoJo
30 de abril
9:00 a 13:00: Sesión de visionado, revisión e perfeccionamento.