Movistar reduce o prezo para gozar de datos móbiles en Andorra

venres, 11 de agosto do 2017 Marcus Fernández

O pasado 15 de xuño dixemos adeus ás recargas por itinerancia móbil na Unión Europea, pero a chamada itinerancia como en casa deixaba fóra a territorios como Andorra, Albania, Turquía ou Suíza, o que provoca non poucas sorpresas desagradables, especialmente ao viaxar a eses territorios cos datos do móbil activados, o que pode supor importantes cargos, aínda que hai grandes diferenzas entre operadores, de xeito que, por exemplo, Vodafone non cobra recargas por itinerancia no caso de usuarios que viaxen a Suíza, Albania e Turquía, e agora Movistar está a tomar medidas con Andorra, pois pechou un acordo con Andorra Telecom para reducir os custos da itinerancia móbil.
Deste xeito, cando un usuario de Movistar viaxe a Andorra non terá que desactivar os datos do móbil e quedar illado dos seus contactos a través, por exemplo, de WhatsApp, xa que terá accesible unha nova tarifa diaria que por 9 euros/día ofrece 3 GB de datos, o que pode parecer que non é un prezo económico, pero se o comparamos cos 12,10 euros/MB que había que pagar até o momento (e que actualmente hai que pagar se empregamos a banda larga móbil en Suíza cunha liña española de Movistar) é unha auténtica ganga e fará que moitos opten por manterse conectados durante as súas viaxes ao enclave turístico. Superados os 3 GB de datos facturaranse outros 9 euros para gozar dun novo bloque de 3 GB de datos a consumir no mesmo día.
O resto de tarifas en itinerancia móbil en Andorra manterase na liña do que xa había, con chamadas a España ou Andorra a 1,82 euros/minuto e chamadas recibida a 1,82 euros/mes (cun establecemento de 1,21 euros).
Para evitar sustos, o consumo mensual en itinerancia está limitado a 60,50 euros.

PUBLICIDADE