Mundos Digitales botou a andar cunha grande afluencia de público

A primeira xornada de Mundos Digitales arrincaba na mañá en PALEXCO cunha longa ringleira de asistentes esperando ser acreditados, superando incluso as expectativas da organización. O Congreso Internacional de Animación, Efectos Visuais e Novos Media, con sede na Coruña desde os seus inicios, espertou nesta vixésimo primeira edición o interese dos profesionais do sector, que responderon á chamada e acudido de todas partes do mundo para asistir aos relatorios e charlas programadas.
Louisa Bremner foi a encargada de abrir as xornadas tras a charla inaugural, e fíxoo cun interesante relatorio sobre a revolución nos efectos visuais. A Dra. Louisa Bremner é supervisora e consultora independente de produción virtual. Traballou en películas e series de televisión como La Casa del Dragon, Matrix Resurrections, Muerte en el Nilo e Pinocho de Disney.
Non foi o único relatorio que atraeu o interese dos asistentes: David Blanco profundou na adaptación dos recursos a cada proxecto analizando o caso de Tadeo Jones 3, Franc Vila desentrañou os pormenores sobre como montar un proxecto anime young adults de alto nivel, Christian Dan Bejarano (parte do equipo da premiada Super Mario Bros) falou sobre a xestión de longametraxes en remoto, Fran Porras analizou fotogrametría, polarización cruzada e HDRi, Dave Tyner e Alberto Areas penetráronse nos fluxos de traballo na nube en espazos compartidos, Ed Hooks falou aos asistentes de actuación e animación, Rajesh Sharma ocupouse de desmitificar a IA, José Antonio Labandibar e Pedro Martínez Mosteiro analizaron esa mesma IA desde unha perspectiva instrumental, como ferramenta de traballo, David Martín centrou o seu relatorio nos FX aplicados a videoxogos, Óscar Monzón dedicou o seu relatorio para analizar a captura do movemento e a nova Alba Meijide analizou a inspiración que pode atoparse na IA, estreando a sede de Afundación, aberta ao público xeral.
Unha xornada inaugural de éxito e chea de análise e redes de traballo, que contou tamén coa apertura da Feira de Emprego.

Un venres cheo de citas de interese

O venres Mundos Digitales celebrará unha segunda xornada, que multiplica as súas citas, e que arrincará ás 10 da mañá en PALEXCO con tres relatorios simultáneos, para todos os gustos, e cun café con Arnau Olle. Desde ese momento e ata as 20:30, momento en que concluirá, en Afundación, o relatorio de Carlos Santana, Benvidos á 4ª revolución, ambos os espazos (PALEXCO e Afundación) serán un fervedoiro de creatividade, networking e avances tecnolóxicos, da man dos máis recoñecidos profesionais do sector.