Nintendo continúa a dominar o mercado de consolas domésticas e portátiles

Unidades vendidas ata este mes das consolas de última xeración

Unha vez pasado o Nadal, é un bo momento para dar un repaso ás vendas de consolas de videoxogos, que no caso das portátiles están totalmente inclinadas en favor da Nintendo DS, que con 70,65 millóns de unidades a nivel mundial ten o 67,9% do mercado, mentres que nas consolas domésticas a situación está máis rifada, quedándose Nintendo só co 44,8% do pastel da nova xeración pese a que non é unha consola de alta definición, o que non lle impediu vender 24,58 millóns de unidades en todo o mundo (dos que 660.000 corresponden a España).
Nas consolas de alta definición a Xbox 360 aínda supera á PlayStation 3 con 18,35 millóns de unidades fronte aos 11,92 millóns de consolas de Sony, que aínda que van medrando en penetración de mercado (chegando xa ao 21,7%).
Pese a que a PS3 parece ser a consola de videoxogos menos vendida ata o momento, o lanzamento de novos títulos coma GTA IV e o abandono do formato de alta definición HD DVD (superado polo Blu-ray de Sony) poderían cambiar a situación en poucos meses, para iguala á consola de Microsoft, que é a máis rendible para os fabricantes (xa que os seus propietarios adquiren bastantes xogos mentres que en consolas como a Wii parecen conformarse cos xogos que veñen de serie).