Nintendo rexistra perdas netas no primeiro semestre fiscal do ano

O éxito de Nintendo coa súa Wii e cos distintos modelos de Nintendo DS non podía ser infinito, e cando se esgota o ciclo de vida dun produto é preciso renovarse, de aí que en marzo vaian achegar as 3D sen lentes coa Nintendo 3DS, pero mentres, as contas da compañía nipona reséntense, e no último semestre fiscal rexistraron unhas perdas netas de 2.010 millóns de iens (17,84 millóns de euros) cando no mesmo período do ano anterior tiñan uns beneficios de 69.490 millóns de iens (616,84 millóns de euros). De feito, estamos ante a primeira vez en 7 anos que Nintendo rexistra perdas brutas no primeiro trimestre fiscal, e no segundo ano seguido no que caes as vendas de Wii (algo inevitable cando a consola doméstica de Nintendo está presente en case todos os fogares con nenos).
A situación económica da compañía vese agravada en boa medida pola mala posición do ien, moeda que está excesivamente fortalecida, de xeito que se analizamos de xeito independente os resultados de cada país non teriamos unha percepción tan negativa dunha situación que promete mudar radicalmente en 2011, aínda que mentres terán que enfrontarse a un segundo semestre de 2010 no que terán moi complicada a súa situación no mercado, cunha Wii que terá difícil reaccionar ante a competencia que coloca no mercado sistemas de control de movemento alternativos ao mando da Wii (PlayStation Move e Kinect) e unha Nintendo DS/DSi que ve reducido o seu catálogo de novidades porque os estudos de desenvolvemento están a esforzarse de cara ao lanzamento da 3DS.