O Blu-ray tivo boa acollida na feira nipona CEATEC

A guerra de formatos para suceder ó DVD amósase publicamente en cada feira tecnolóxicas e na última, a xaponesa CEATEC, parece que saíu vitorioso o Blu-ray, mentres que nas feiras occidentais normalmente falan do éxito do HD DVD.
Así, durante este tipo de eventos se pon na balanza as mellores prestacións do Blu-ray contra o mellor prezo do HD DVD, aínda que a impresión que sacan os consumidores e analistas se deben principalmente ós seus respectivos promotores. O HD DVD está fabricado por NEC e Toshiba, mentres que o Blu-ray o fabrica Sony co apoio de Matsushita (Panasonic) e Sharp, e posiblemente serán os contidos os que definirán o éxito dos dous formatos (pois as produtoras cinematográficas están a pechar acordos exclusivos cun formato ou o outro).
Segundo os asistentes ó CEATEC, o Blu-ray foi o formato que contou con mellores presentacións e máis material exposto, polo que a súa promoción foi máis efectiva, e se puideron ver en funcionamento gravadores e lectores de marcas como Sony, Matsushita, Samsung, Sharp, LG, Philips e Misubishi, mentres que o HD DVD parecía contar coa simple presenza de Toshiba e a Xbox 360 de Microsoft.
De tódolos xeitos, a feiras só serven como promoción inicial, xa que estes produtos tardarán en entrar no mercado de consumo real, pois aínda teñen uns prezos excesivamente elevados como para chegar ó grande público, quedando só relegados a arriscados early adopters que, como aconteceu cos primeiros reprodutores de DVD, verán como os carísimos dispositivos mercados hoxe se converten en máquinas obsoletas en poucos meses.