O CESGA achega infraestrutura para o deseño da nanotecnoloxía clave nas comunicacións ópticas

Temos no panorama de investigación internacional un novo (e innovador) desenvolvemento que conta con mans e tecnoloxía galegas, máis polo miúdo as do Centro de Supercomputación de Galicia (CESGA) e máis a Universidade de Vigo. En detalle, trátase dun nanolink (nanotecnoloxía, ciencia do miúdo, ao servizo das comunicacións) con capacidade para despexar atrancos na obtención do máximo rendemento posible dos nanochips, os futuros circuítos integrados ópticos. Este nanolink, en cuxo desenvolvemento participa o CESGA achegando estrutura para o seu deseño, resolverá por fin os problemas de interconexión e quecemento dos nanochips, proceso que se debe sobre todo á inclusión no seu de guías que basicamente perden enerxía e ocupan espazo de máis.
A resposta a todo isto, segundo sinala o CESGA, está nas ligazóns con nanoantenas ou nanolinks.
Este tipo de ligazóns proveñen do eido das telecomunicacións en radiofrecuencia e microondas, pero vense de descubrir que teñen un gran potencial neste outro ámbito das comunicacións ópticas. Segundo explica o centro galego de I+D, “o gran desafío para a súa aplicación a estas frecuencias, a parte das dificultades tecnolóxicas da súa fabricación, radica no comportamento electromagnético plasmónico que posúen os nanomaterias ao interactuar coa luz”.
Este comportamento, polo visto, é moito máis complexo do que posúen os mesmos materiais a frecuencias convencionais. Neste senso, as Universidades de Estremadura e Vigo demostraron que, calculando a resposta plasmónica de forma exacta con ferramentas de simulación electromagnética rigorosa e o uso de supercomputadores, a teoría electromagnética clásica e os coñecementos adquiridos ao longo de décadas de desenvolvemento no ámbito da radiofrecuencia e os microondas poden ser aplicados ao deseño de novas aplicacións nanotecnolóxicas. A aplicación utilizada para iso, HEMCUVE++, foi desenvolvida de forma continuada polas Universidades de Estremadura e Vigo ao longo de máis de 13 anos. Esta ferramenta, engade o CESGA, “ten a calidade fundamental de combinar unha elevada exactitude nos cálculos coa utilización eficiente de grandes supercomputadores; por este motivo, en 2009 as ditas institucións educativas foron galardoadas con dous prestixiosos premios pola súa contribución á introdución da supercomputación no electromagnetismo”. Nesta ocasión, empregouse o supercomputador estremeño Lusitania, do CénitS, e o supercomputador Finisterrae, do CESGA, para o deseño dos distintos compoñentes da nanoligazón óptica. O traballo orixinal atópase dispoñible a través da ligazón j.mp/nanolink.