O CESGA presenta unha iniciativa de computación na nube para combater o cancro

Do 6 ao 7 de novembro celebrábase na cidade de Gent (Gante, Bélxica) a FIRE Engineering Workshop, unha conferencia onde estivo presente o CESGA (Centro de Supercomputación de Galicia ) co gallo de amosar a súa nova proposta e-IMRT que tivo unha moi boa acollida. O proxecto en cuestión -desenvolvido no CESGA co apoio doutras institucións galegas- permite executar nun supercomputador as simulacións requiridas para axustar a dose dun tratamento de radioterapia, tratamento que emprega raios de alta enerxía (raios X) para eliminar ou reducir as células cancerosas, tendo un inconveniente como é o de afectar tamén ás células non enfermas.
Por esta razón, e para evitar que se danen os órganos non enfermos, hai que empregar modelos matemáticos e simulacións que calculan de forma personalizada o tratamento. A alternativa é realizar unha simulación computerizada do tratamento de radioterapia e o CESGA presentou unha opción mellorada e máis rápida desta simulación, pois os resultados requiridos nestes casos teñen un límite de tempo. O CESGA asignou para cada simulación un grupo de computadores virtuais nunha plataforma Cloud, sendo comprobada a efectividade do proceso dentro dunha das 4 iniciativas que reúne o proxecto de investigación europeo BONFIRE, destinado a comprobar as posibilidades de novos usos das plataformas Cloud -computación na nube-. O dito BonFIRE é un proxecto europeo de infraestruturas de investigación e experimentación da Internet do Futuro (FIRE) que achega unha plataforma de Cloud experimental.
Cómpre engadir que xa dende comezos de novembro, BonFIRE dá acceso libre e gratuíto a empresas e investigadores que queiran probar novos servizos ou tecnoloxías na nube. Asemade, a infraestrutura virtual deseñada en BonFIRE pode aplicarse noutros proxectos do eido industrial que requiran realizar cálculos complexos con garantía de calidade no servizo de simulacións por computador nun período de tempo axustado.