O CSA da Cidade das TIC acollerá un cumio sobre intelixencia artificial

A compañía especializada en IA e ciencia de datos con sede en Narón, DataSpartan, organiza unha nova edición do Corunna Innovate Summit, evento sobre a Internet das Cousas, a ciencia de datos e intelixencia artificial que terá lugar os vindeiros días 26 e 27 no recentemente inaugurado Centro de Servizos Avanzados da Cidade das TIC.
Estas xornadas buscan un achegamento a tecnoloxías que están a ter un grande impacto social e empresarial nos últimos tempos, e conta con destacados relatores que ilustrarán sobre temas de grande interese como a investigadora Amparo Alonso (UDC), o científico informático Paco Nathan (Derwen.a), o experto en aprendizaxe automático antagónico Luis Muñoz-González (Telefónica Research), enxeñeiro de telecomunicacións Lois Orosa (CESGA), en enxeñeiro de software de IA Bruno Cabado (Cinfo), o empresario José Manuel Maseda (Wapping) a enxeñeira de telecomunicación Laura Pereira Maurí (Inova), o enxeñeiro informático Salman Huassain (Zeed), a experta en lingüística comparada Natalia Elvira (Argilla), o enxeñeiro de telecomunicacións Roberto Pérez (Clúster TIC Galicia) e mesmo o director da Cidade das TIC, Alfonso Martínez.
A primeiro día do cumio as actividades limítanse a un par de relatorios entre as cinco e seis e media da tarde impartidos por Luis Muñoz González e Natalia Elvira respectivamente, mentres que no segundo repartiranse distintos relatorios ao longo da mañá e á primeira hora da tarde, aproveitándose a ocasión para que os asistentes poidan coñecer en profundidade o proxecto da Cidade das TIC.