O Campus Industrial de Ferrol acollerá un Campamento Tecnolóxico de verán para a mocidade

mércores, 3 de maio do 2023 Redacción

O Campus Industrial de Ferrol acollerá, a última semana do mes de xuño, o Campamento Tecnolóxico, un campamento de verán dirixido á rapazada de entre 6 e 16 anos que organiza, por segunda vez, o propio Campus Industrial de Ferrol. A oferta lúdico-formativa deste campamento inclúe obradoiros centrados nas áreas de investigación do Campus Industrial de Ferrol. Os diversos desafíos tecnolóxicos abordarán desde temas de robótica, impresión 3D e programación ata coñecementos de construción naval, electricidade e mecánica.
A rapazada traballará man a man co estudantado e persoal docente das enxeñerías do Campus Industrial de Ferrol para desenvolver habilidades relacionadas coa linguaxe de programación, a metodoloxía enxeñaril e as novas tecnoloxías.
Os obradoiros desenvolveranse entre o 26 e o 30 de xuño de luns a venres, en horario de 9:00 a 14:00. Existe a posibilidade de participar na modalidade Madrugadores, de 8:00 a 15:00, na que se inclúe a maiores un servicio de comedor. A tarifa xeral é de 119 euros por semana completa. O prezo para as persoas integrantes da comunidade universitaria é de 99 euros. Aquelas persoas que se anoten ao servicio de madrugadores terán que abonar a maiores 15 euros polo almorzo semanal e/ou 35 euros polo xantar semanal, segundo desexen. Tamén se ofrece un desconto do 50% a partires do segundo neno ou nena, inscrito/a pertencente á mesma unidade familiar.

PUBLICIDADE