O Final Cut Pro superou a barreira do millón de licenzas vendidas

As solucións de vídeo de Apple parece que teñen máis forza que nunca, e tralo lanzamento do novo Final Cut Server hai un mes, agora anuncian que o Final Cut Pro chegou ao millón de licenzas vendidas.
Os rumores que apuntaban ao abandono deste mercado por parte de Apple resultaron ter moi pouco fundamento, especialmente polo éxito que está a acadar tal solución software, que ocupa o 49% do mercado da edición profesional de vídeo nos EE.UU., mentres que o Avid (moi popular en Europa) só chega ao 22%.
O servidor de vídeo para Final Cut demorou bastante o seu lanzamento, pero segundo o director de comercialización de aplicacións de vídeo profesional de Apple, Richard Townhill, foi debido a que querían que «funcionase sen que un departamento de informática tivese que mantelo». Ou sexa, que Apple non só coidou que o seu software cliente sexa doado de manexar, senón que simplificou ao máximo a administración do seu servidor de vídeo, que se vende a 899 euros para 10 clientes concurrentes ou a 1.799 euros para un número ilimitado de clientes.