O Magic Mouse sitúa a Apple coma o 3º vendedor de ratos informáticos

Os datos de vendas do NPD Group desvelan que Apple conseguiu dobrar a súa presenza no mercado dos ratos informáticos en só 8 semanas grazas ao novo Magic Mouse, que incorpora tecnoloxía multi-táctil na súa superficie en vez de botóns ou da típica roda de desprazamento, así coma establece comunicación co ordenador sen fíos a través de Bluetooth, razóns que están a instar aos maqueiros á súa adquisición pese a que ten un prezo moi elevada por un produto deste tipo (véndese a 69 euros).
Os datos dos que falamos non incluirían ao ratos incluídos cos novos iMac (polo que na práctica as vendas do Magic Mouse aínda serían maiores) e deste xeito Apple conseguiría colocarse nunha terceira posición na venda de ratos, só detrás de Logitech e Microsoft, superando a HP e a Targus, o que é un resultado sumamente positivo que sorprende nunha categoría de produtos bastante consolidada, aínda que habería que advertir de que o Magic Mouse é un produto novo, polo que tamén resulta normal que teña unhas vendas fortes, que poderían suavizarse nos vindeiros meses.