O WebTV de Blusens renova a súa interface de uso

O popular dispositivo da galega Blusens que converte o televisor nunha porta á Internet a a multitude de contidos audiovisuais achegados dende dispositivos externos, a Rede ou a TDT de alta definición, o WebTV, vén de actualizar o seu firmware, o que supón unha renovación da súa interface de usuario (moito máis visual e intuitiva), do seu navegador web (que permite a descarga e reprodución de arquivos directamente, dando a impresión que se está fronte a pantalla dun PC, pois incluso incorpora fichas) e incorpora a función picture-in-picture (PIP) que fai posible gozar de 2 contidos á vez (de xeito que podemos ver un vídeo de Internet a pantalla completa mentres vemos nun pequeno recadro unha canle de TDT durante os anuncios do noso programa favorito).
Esta revisión do WebTV tamén integra servizos de descarga/reprodución de contidos baseados na Internet como Wupload, Uploaded.to, AllMyVideos.net e Movshare, xunto con moitas outras melloras no funcionamento habitual do dispositivo.
Dende Blusens tamén informan de que a popular aplicación MÁS SERIES, que facilita a visualización de contidos compartidos na Internet directamente no televisor, conta cunha nova versión dispoñible no Instalador de Aplicacións do WebTV.