O Zune HD recibe boas críticas anticipadas

O lanzamento do Zune HD é inminente nos EE.UU., pero dende Cnet xa tiveron a oportunidade de probar o novo reprodutor multimedia portátil de Microsoft, adiantando detalles do funcionamento deste trebello que pretende bater ao iPod Touch, e que destaca pola súa pantalla táctil capacitiva OLED de 3,3 polgadas cunha resolución de 480 x 272 píxeles, un procesador nVIDIA Tegra, Wi-Fi e a posibilidade de reproducir vídeo en alta definición a 720p (que pode presentarse no televisor grazas a unha base con conexión HDMI). Esta última función estaría apoiada polo Bazar de Xbox LIVE, que podería permitir que todos os seus contidos non estean dispoñibles só para a Xbox 360, senón tamén para o prometedor Zune HD do que aínda non se coñecen os posibles plans de comercialización en Europa (os modelos anteriores de Zune non chegaron a exportarse).
Sobre a navegación por páxinas web, aseguran que é tan boa coma dende o iPhone, contando coa súa mesma carencia (falta de soporte de Flash) e carecendo polo momento da posibilidade de acceder a contidos de YouTube (o que dende o iPhone xa está arranxado dun xeito que podería replicar en breve o novo trebello de Microsoft).