O festival SXSW sucumbe ante o COVID-19

Tras a cancelación do MWC, a GDC, o F8 e o Google I/O, resultaba incrible ver como dende a organización do South by Southwest (SXSW) seguían na teima de celebrar o seu evento, pese a que a meirande parte das empresas participantes manifestaran que non acudirían por mor do coronavirus. Pero finalmente foi o propio Concello de Austin quen decidiu que non podía celebrarse este encontro de profesionais dos mundos do videoxogo, o cine e a música, de xeito que sería a primeira vez en 34 anos na que non se celebraría este evento no mes de marzo.
Dende o Concello entende que a cancelación do SXSW ten repercusións moi negativas para numerosos profesionais e empresas que aproveitaban tal oportunidade para conseguir certa proxección, e para numerosos negocios locais que aproveitaban a grande afluencia de persoas á cidade, pero decidiron colocar a seguridade nun primeiro plano, e polo momento só poden concretar que o SXSW non terá lugar en marzo, sen desbotar a súa celebración máis adiante ou a posibilidade de que algunhas das actividades previstas inicialmente poidan realizar a través da Internet.
En 2019 acudiron ao SXSW un total de 73.716 persoas, das que 19.166 viñan de fóra dos EE.UU., relación de asistentes que de repetirse na situación actual sería unha grande irresponsabilidade.

Vindeiras cancelación

Queda agora por saber o que fará Apple coa celebración da WWDC, que previsiblemente sexa o vindeiro evento anual que non chegue a celebrarse por mor do COVID-19, aínda que nese caso aínda non se convocou o congreso, polo que non sería unha cancelación propiamente dita, existindo tempo dabondo para que tal encontro poida reformularse para que os profesionais que tivesen previsto acudir poidan participar remotamente en numerosos relatorios e obradoiros.
A situación de Apple non sería moi preocupante, mentres que a ESA si tería máis difícil o caso da feira de videoxogos E3, prevista para os días 9-11 de xuño, xa que a cancelación do evento físico podería prexudicalo de cara ao futuro, ao activar mecanismos de comunicación a través da Internet que levarían a que o E3 perdese relevancia. De feito, na edición deste ano non tiña previsto participar Sony e Nintendo xa hai tempo que os seus grandes anuncios os realizan a través de streaming, polo que o grande valedor da cita podería considerarse que sería Microsoft (o que tampouco sería totalmente certo, xa que as súas presentacións realízanse nun recinto separado ao do E3).