O proxecto TIC dun estudante da Universidade de Vigo impúxose no certame da EOI

Ruben Míguez presentando o seu proxecto Berce na Escola de Organizacion Industrial

A investigación galega foi obxecto os días pasados dun importante recoñecemento, co valor engadido de que se trata dun recoñecemento ás novas xeracións e ao seu espírito innovador. A distinción veu da man do comité organizador e do xurado do Concurso Emprendedor Universitario EOI, certame estatal que xurdiu en 2003 co obxectivo de salientar ideas de mercado e vontade empresarial entre estudantes de toda España. Nesta edición 2012, a novena, o gañador foi Rubén Míguez, enxeñeiro de Telecomunicacións da Universidade de Vigo, responsable do proxecto Berce, unha iniciativa para mellorar a comunicación e colaboración entre o fogar e a escola, con apoio directo en Internet.
De feito, Internet é o único requirimento que se esixe para facer uso desta proposta, que se basea en abrir as posibilidades da educación a través das tecnoloxías. Rubén Míguez, que recibiu con este premio unha bolsa valorada en 18.000 euros para realizar un master en EOI (Escola de Organización Industrial) e unha viaxe a Silicon Valley, impúxose na recta final do certame a outros catro emprendedores novos dos centros universitarios de Valencia, Vigo, Baleares e Andalucía. A edición 2012 deste concurso, contou coa participación de máis de 200 universitarios, e nela avaliáronse 120 proxectos.
No fallo do certame o comité de expertos ditaminou que Raúl Jiménez, informático malagueño que se presentou ao Concurso por Andalucía Emprende Fundación Pública Andaluza, obtiña o segundo premio, unha bolsa completa para realizar un master en EOI. A súa proposta foi GeoRemindMe, proxecto que ofrece ferramentas tecnolóxicas que permiten compartir información xeolocalizada e ás empresas realizar campañas de mercadotecnia máis efectivas.