O regulamento europeo de protección de datos centra unha xornada organizada polo CPEIG e a AMTEGA
martes, 25 de outubro do 2016
Esta mañá celebrouse en Santiago de Compostela unha xornada
sobre o regulamento europeo de protección de datos organizada polo CPEIG e a AMTEGA,
participando na inauguración a directora en funcións da Escola Galega de
Administración Pública (EGAP), Sonia Rodríguez-Campos; a directora en funcións
da Axencia para a Modernización Tecnolóxica de Galicia (AMTEGA), Mar Pereira;
Fernando Suárez, presidente do CPEIG e Miguel Ángel Davara, catedrático de
Dereito Informático e de Informática para Xuristas da Facultade de Dereito da
Universidade Pontificia Comillas.
Durante a súa intervención, Sonia Rodríguez-Campos incidiu
no importante reto ao que se enfronta a Administración pública canto á xestión
dos datos persoais da cidadanía, ao ter o deber de seguir traballando para
facilitar a libre circulación desta información pero sen esquecer que é
imprescindible garantir un elevado nivel de protección. Neste eido, destacou, é
fundamental incidir na formación dos empregados públicos como responsables
últimos de aplicar a normativa dentro das institucións e, en consecuencia,
ofrecer un mellor servizo á cidadanía.
A directora en funcións da EGAP lembrou que dende este
organismo se vén ofrecendo desde hai xa varios anos formación específica e
transversal relativa á protección de datos persoais baixo actividades como
“Seguridade informática básica”, “Iniciación á Administración electrónica.
Seguridade da información e protección de datos”, “Perfeccionamento de xefatura
de sección”, “Perfeccionamento de xefatura de negociado” ou “Atención ás
vítimas o delito e información ao cidadán”.
A directora en funcións da AMTEGA, sinalou que “a
vertixinosa evolución tecnolóxica dos últimos anos facilítanos o manexo dunha
gran cantidade de datos, que se traducirán en servizos e solucións cada máis
personalizadas para os cidadáns e nunhas administracións que se poderán
anticipar ás necesidades dos seus administrados”. Mar Pereira insistiu en que
“é fundamental que todo isto se faga garantindo a protección dos datos
persoais, e de aí a importancia deste novo regulamento europeo”.
A responsable en funcións do departamento tecnolóxico da
Xunta lembrou a importancia de adaptarse canto antes a este novo regulamento
que chega, precisamente cando acaba de entrar en vigor a Lei 39/2015 que supón
o lombeirada definitiva a Administración dixital. Neste sentido subliñou a
necesidade do traballo interdisciplinar entre xuristas e tecnólogos para que a
evolución tecnolóxica vaia acompañada do marco normativo que precisa.