O vindeiro martes abrirase a inscrición para a vindeira edición de Xuventude Galicia Net

O encontro informático Xuventude Galicia Net prepara unha nova edición en Silleda, nas instalacións da Feira Internacional de Galicia, destacando esta XVII edición por adoptar o nome de XGN R Encounter para indicar claramente o patrocinio oficial do operador R, que colaborará tamén a nivel técnico e de contidos.
Dende a Dirección Xeral de Xuventude, Participación e Voluntariado da Xunta de Galicia informan de que o encontro que terá lugar entre os días 8 e 10 de setembro abrirá a súa inscrición o vindeiro 22 de agosto ás 10:00 horas a través da súa páxina web oficial, tendo que aboar 30 euros os interesados en participar. Como novidade, durante o procedemento de inscrición poderanse elixir os postos a ocupar durante o encontro, o que facilitará que os participantes que acudan en grupo poidan situarse na mesma zona do recinto no que habilitarán 1.044 postos.
Outra novidade da vindeira edición de Xuventude Galicia Net é que o evento contará cunha aplicación móbil de seu.

Máis velocidade de conexión

A XGN R Encounter manterá en 2017 a súa formulación, se ben se reforzarán as súas prestacións ao multiplicar por cinco a velocidade de conexión grazas a R (contará con 10 Gbps simétricos de fibra óptica, ademais de 1 Gbps de respaldo). Tamén se potenciará o seu programa de torneos e actividades.
Estas melloras forman parte dun proxecto conxunto que pretende que a XGN R Encounter medre ata converterse en tres ou catro anos nunha das LAN partys máis importantes de España, ao tempo que significa fraternizar e contar a nivel técnico e de contidos coa bagaxe da party Euskal Encounter, organizada por Euskaltel en Bilbao e que acaba de celebrar a súa edición número 25. Ademais, supón a vinculación da party coa rede de Encounters da que tamén forman parte a Gipuzkoa Encounter, que suma 11 citas, e a Araba Encounter, que este ano celebrará a súa cuarta edición.
A XGN R Encounter contará cunha zona Intranet orientada aos inscritos, os cales poderán desfrutar dun posto con dereito a acampar no interior do pavillón e tamén a participar en numerosas actividades e torneos exclusivos. Unirase de novo a ela a Extranet, unha área que acollerá un completo programa con multitude de actividades ás que poderán acceder tanto os inscritos como os visitantes que acudan ao recinto. Ademais, volverá a incluír un espazo expositivo complementario con presenza de empresas relacionadas co material informático e o ocio electrónico, entre outros.
Aínda que o evento comezará oficialmente o día 8, abrirá as súas portas de forma non oficial o 7 de setembro ás 16.00h, co obxectivo de facilitar o acceso dos inscritos e permitir que aqueles que o desexen comecen a instalar os seus postos e útiles para durmir. Será unha xornada de probas técnicas e montaxe.