Os contidos de Sky TV xa están accesibles dende a Xbox 360 no Reino Unido

Os contidos de Sky poden verse baixo demanda a través da Xbox 360

As plataformas de visualización de televisión cada día son máis amplas, e tras a TDT, o satélite ou o cable, van xurdindo outras opcións alternativas como a Internet e, máis recentemente, as consolas de videoxogos, o que no Reino Unido concrétase de xeito destacable na Xbox 360 e a posibilidade de acceder dende a mesma á programación de Sky TV.
Dende esta semana os usuarios Gold de Xbox LIVE que teñan a súa Xbox 360 conectada á Rede a unha velocidade de coma mínimo 2 Mbps poden acceder á programación de Sky TV dende a súa consola, aínda que o servizo é de pago (a subscrición ao paquete básico é de 15 libras esterlinas, ás que habería que engadir 19 libras no caso de querer a programación deportiva ou 17 libras para incorporar canles de cine).
O novo servizo permite a visualización dos programas de Sky TV en directo, pero a cousa non queda aí, sendo tamén posible acceder a centos de contidos baixo demanda (películas, eventos deportivos, programas de éxito e documentais) e incluso poden aproveitarse as posibilidades da Xbox 360 para chatear cos amigos durante o seguimento de películas e retransmisións deportivas.
Haberá que ver cal é a resposta desta nova plataforma, que podería exportarse a outros países no futuro, de xeito que a televisión a través da Internet pode deixar de entenderse coma un produto relacionado co ordenador, converténdose só nun medio de difusión dos contidos.