Os fallos da PSN incrementan o número de usuarios que mudan a PS3 pola Xbox 360

A confianza e paciencia dos xogadores parece ter un límite, e segundo a publicación británica EDGE, podería terse superado, pois o feito de que a PlayStation Network leve máis de 3 semanas fóra de servizo podería estar a levar a moitos usuarios da PlayStation 3 a mudar a súa consola pola Xbox 360.
Dende as tendas británicas aseguran que a primeira semana de caída da PSN non se notou ningún cambio de tendencia, pero á segunda semana xa se incrementou máis do 200% o número de consolas PlayStation 3 vendidas polos consumidores, o que na metade dos casos rematou coa compra dunha Xbox 360. Nalgúns establecementos falan dun «incremento masivo» de usuarios que venden a PS3 para facerse coa consola de Microsoft, ou sexa, que estes usuarios non vende a súa consola por necesitar cartos, senón para poder seguir xogando en liña.
Nas vendas de videoxogos no Reino Unido tamén se está a notar o cambio de tendencia, de xeito que títulos como Call of Duty: Black Ops só venden agora o 24% das unidades para PS3 (66% a versión de Xbox 360), cando noutros momentos a PlayStation 3 era a plataforma que vendía máis copias. Tamén pasa algo semellante co FIFA 11 (que actualmente só vende o 21% das unidades para PS3) e outros títulos con modo de xogo en liña.
Tamén detectouse un cambio de percepción por parte do público, que protesta polos problemas da PlayStation Network e deixou de queixarse polo feito de que xogar en liña a través de Xbox LIVE fose de pagamento.
Algúns establecementos son moi conscientes das repercusións da imposibilidade de xogar en liña coa PS3, e en Alemaña a cadea GameStop ten unha agresiva promoción a través da que cambian as consolas PS3 Slim por unha Xbox 360 con 250 Gb de disco duro, 800 puntos e 3 meses de Xbox LIVE Gold, motivo que pode levar a moitos a dar un salto que noutras circunstancias parecería imposible.