Os tablets comezan a eclipsar aos ordenadores ultraportátiles

Un informe elaborado por ABI Research destaca o feito de que os tablets comezaron a eclipsar aos ultraportátiles no segundo trimestre do ano, e mentres que no primeiro trimestre de 2011 os fabricantes colocaron no mercado 8,4 millóns de netbooks superando os 6,4 millóns de tablets, no segundo trimestre mudaron as tornas e os netbooks caeron aos 7,3 millóns de unidades enviadas, mentres que os tablets dispararon a súa produción ata os 13,6 millóns de unidades.
Dende ABI Research consideran que esta tendencia non vai reverterse, e que a demanda de dispositivos tipo tablet vai manterse por considerar que pertencen a distintos segmentos, e non compiten polos mesmos usos (chegando os tablets a un público maior).
O feito de que os tablets carezan de rato e teclado transmite a sensación de que son dispositivos máis doados de utilizar, rachando unha barreira que incluso atrae a consumidores de certa idade (que consideran que os ordenadores son demasiado complicados), aínda que aínda se mantén un argumento en favor dos netbooks: o seu prezo (é doado atopar un ultraportátil á metade de prezo dun iPad).
Estímase que 2011 vai rematar cunha produción de 32 millóns de ultraportátiles e 60 millóns de tablets, o que debuxa un panorama difícil de imaxinar hai un par de anos, cando os netbooks eran un produto de moda, que parece que vai atopando o seu sitio (pois o público entendeu que non son ordenadores baratos, senón equipos pensados para o seu uso en mobilidade).