Os televisores 3D aínda non convencen aos consumidores

A febre polas 3D neste último ano grazas principalmente pola súa xeneralización nas salas cinematográficas de todo o mundo levou a un importante número de consumidores a adoptar esta tecnoloxía no seu ámbito doméstico, experiencia que decidiron analizar nun novo informe elaborado por The Nielsen Company en colaboración coa Cable & Telecommunications Association for Marketing, deixando clara a actitude xeneralizada do público: agardar para ver cara onde vai esta tecnoloxía.
Como atrancos para a adopción doméstica das 3D están o alto prezo dos televisores (o que manifestaron o 68% dos consultados), a necesidade de ter que utilizar lentes para a visualización estereoscópica (57%) e a reducida oferta de contidos en 3D (44%). O informe de Nielsen suxire que, de saber a industria manexar axeitadamente as eivas criticadas polos consumidores, estes poderían chegar a aceptar a televisión en 3D nas súas vidas, pois o 57% dos televidentes aseguran que as 3D axudan a sentirse «parte da acción» e o 48% sentiu que enganchaba máis ao que se estaba a ver. Incluso o 47% dos consultados admitiron que as 3D poderían levalos a ver programas que doutro xeito ignorarían.
Os videoxogos parecen ser un dos principais motores que achegarán usuarios ás 3D, de xeito que o 42% dos consultados amosaron interese neste ámbito, pero entre os xogadores habituais a porcentaxe increméntase ata o 71%, o que podería responder en boa medida polo feito de que os contidos en 3D non deberían ser un problema neste ámbito (a meirande parte dos videoxogos fan uso de motores tridimensionais que poden adaptarse de xeito doado para sistemas de visión estereoscópica).