Presentación da Semana da Ciencia no Café Casino de Santiago

Mañá martes, día 4 de novembro ás 12:30 horas, terá lugar, no Café Casino de Santiago de Compostela, a presentación da Semana da Ciencia 2008, un evento de carácter europeo que reunirá na capital galega a numerosas entidades públicas e privadas relacionadas coas ciencias e a tecnoloxía, que lle amosarán á cidadanía a utilidade das mesmas para a súa vida cotiá.
Este ano, a Semana da Ciencia, que celebra xa a súa oitava edición, desenvolverase do 10 ao 23 de novembro e terá como principal obxectivo “involucrar á cidadanía na ciencia e na tecnoloxía de xeito ameno e accesible”. Para elo, durante os días da celebración do evento, numerosas entidades tales como universidades, centros tecnolóxicos e empresas, abrirán as súas portas e organizarán todo tipo de actividades de divulgación para o público, mostrando todo o relacionado coa ciencia, dende os elementos máis simples aos máis sofisticados.
No acto de presentación, Xesús Ron, compoñente do grupo de teatro Chévere, aproveitará para presentar tamén a actividade principal organizada pola Dirección Xeral de I+D+i para a Semana da Ciencia 2008: o Cabaré Científico S.O.S Planeta Terra, e a súa xira polas cidades galegas.
Dado que o presente 2008 foi declarado Ano Internacional do Planeta Terra pola Unesco, a Semana da Ciencia dedicará este ano especial atención a esta temática.