Prevese rematar a rodaxe de O Apóstolo esta semana
martes, 18 de maio do 2010
Ao longo
dos últimos meses, un equipo de máis de 70 persoas leva traballando a reo no
estudo da produtora santiaguesa Artefacto Producciones, para rematar a tempo a
que será a primeira película de animación
stop motion estereoscópica do noso país e de toda Europa: O Apóstolo, un film de animación do
laureado Fernando Cortizo que recrea o Camiño de Santiago dun xeito moi
orixinal e creativo.
Técnicos
chegados de todo o mundo, e con experiencia en films como Matrix, A moza cadáver, Os mundos de Coraline ou Regreso ao futuro, aunaron a súa
experiencia e esforzo nesta historia de terror, fantasía e suspense vinculada a
algo tan actual como é o Ano Santo e as peregrinacións ata a capital galega
para darlle unha aperta ao Apóstolo.
A cinta está
protagonizada por actores como Carlos
Blanco, Jorge Sanz, Paul Naschy, Jose Manuel Oliveira “Pico”, Celso Bugallo, Luis Tosar,
Atilano Franco, Isabel
Blanco, Manuel Manquiña, Víctor Mosqueira, Pedro Alonso e
Jacobo Rey, entre outros; e conta coa colaboración especial de Geraldine
Chaplin no papel de Dosinda, unha anciá da aldea que acolle na súa pensión ao
hóspede protagonista do film: Ramón.
Todos eles,
segundo veñen de informar dende a produtora, “foron recreados en foam látex, tratando de imprimir nos bonecos os
rasgos máis característicos e identificativos dos propios actores”.
O
resultado final poderémolo ver o vindeiro 17 de xullo no Auditorio de Galicia,
día da súa estrea e data na que está prevista que a Real Filarmonía de Galicia
interprete en directo a B.S.O da película.
Por outra
banda, para as persoas que non teñan a oportunidade de ver a premiere, a súa
chegada aos cines galegos será a finais do verán.