Primeira festa informática do Concello de Narón: a Naronline 2008

O Concello de Narón vén de anunciar a celebración da súa primeira festa informática, a Naronline 2008, que organiza coa axuda da Universidade da Coruña, da Fundación Tecnolóxica Río do Pozo e de diversas empresas relacionadas co sector das novas tecnoloxías da zona.
Os responsables deste evento, pensado para o lecer, a diversión, a aprendizaxe e o intercambio de experiencias entre os seus participantes, pretende dar acollida a unhas 400 persoas procedentes de toda a comarca e do resto de Galicia e España para, por uns días, animalos a dedicárense a realizar todo tipo de actividades relacionadas coa Rede, os videoxogos e as novas tecnoloxías en xeral.
O encontro terá lugar na Praza do Concello de Narón do 18 ao 20 de xullo e, amais de actividades “lúdico-festivas”, os asistentes poderán participar en obradoiros, competicións e relatorios baseados no futuro das comunicacións e no “novo negocio baseado nas TIC”.
Os organizadores pretenden, asemade, que a Naronline 2008 sexa un lugar de integración das novas tecnoloxías para tódolos veciños (tanto da zona rural como da urbana) polo que teñen prevista a habilitación dunha aula onde os cidadáns (en especial os nenos e os maiores) poidan comprobar de primeira man como funciona Internet e cales son as súas posibilidades.
Naronline 2008 tamén contará cun servizo de autobús de balde entre o Pavillón de Deportes Campo da Serra (lugar onde os asistentes de fóra poden durmir e asearse) e a carpa que acolle o evento; e poñerá a disposición das persoas interesadas en “bautismarse” nas novas tecnoloxías, diversos equipos de “alfabetización informática” con profesores especializados que as guiarán nun primeiro contacto coas TIC.

I fin de semana tecnolóxico de Narón
Coincidindo coa celebración da súa primeira “Party”, o Concello ferrolán tamén vai celebrar o I Fin de Semana Tecnolóxico da vila, orientado ao mundo empresarial da comarca, que pretende ser un nexo de unión dos empresarios TIC da zona onde poidan “comentar as súas inquedanzas” e “atopar solucións” aos seus problemas técnicos máis comúns.