Procreate achegará o mundo da animación ao iPad

A aplicación máis popular para a realización de ilustracións co iPad é, sen dúbida, Procreate, á venda por só 14,99 euros, e tras o éxito acadado os seus responsable presentan agora Procreate Dreams, que abre as portas ao mundo da animación por só 19,99 dólares, aínda que teremos que agardar até o 22 de novembro para poder facernos cunha ferramenta que promete ser toda unha revolución para a creatividade.
Procreate Dreams integra nunha única aplicación as ferramentas de debuxo propias de Procreate, engadíndolle opcións de animación para poder debuxar fotograma a fotograma, facer axustes mediante puntos clave, editar vídeo, compoñer... facendo uso de xestos táctiles, o que para moitas destas funcións supón unha grande mellora a nivel de facilidade de uso e velocidade de execución.
Esta ferramenta está optimizada para o seu uso co Apple Pencil, e practicamente abre a calquera o mundo da animación 2D; reimaxina a liña de tempo para que os artistas poidan centrarse en crear; a aplicación ten un rendemento capaz de ofrecer o renderizado da animación en tempo real (evitando así as esperas para previsualizar cada vez que se fai un cambio); permite engadir e animar texto; pode integrar vídeo en ProRes de até 8K; e ofrece versatilidade dabondo para facer dende unha imaxe GIF animada en bucle até unha conexa animación con personaxes.