Publican as especificacións técnicas da PS Vita

Cando Sony anunciou que a súa nova consola portátil, a PS Vita, custaría 249 euros no seu modelo básico e 299 euros no seu modelo con conectividade 3G, moitos foron os rumores que apuntaban a que recortarían as prestacións da máquina fronte ao anunciado previamente para poder axustar o seu prezo, pero finalmente deron a coñecer as especificacións técnicas da PS Vita e dá a talla, o que levou a algúns analistas a asegurar que Sony perderá uns 40 dólares por cada unidade vendida.
A PS Vita medirá 182 x 83,5 x 18,6 mm, contará cunha pantalla OLED capacitiva de 5 polgadas cunha resolución de 960 x 544 píxeles, procesador ARM Cortex A9 de 4 núcleos cun procesador gráfico SGX543MP4+ con 128 Mb de memoria de vídeo, 512 Mb de memoria RAM (o dobre do que ten a PlayStation 3), conectividade Wi-Fi N, Bluetooth 2.1, soporte de audio en MP3, MP4 e WAVE, vídeo en MPEG-4 e H.264 e imaxes en JPEG, TIFF, BMP, GIF e PNG, e moitas outras prestacións entre as que os xogadores agradecerán especialmente a presenza dun segundo stick analóxico.