Pump integra P2P e navegación web

Os afeccionados ás descargas dixitais poden probar unha nova aplicación francesa que aínda están en fase de probas, Pump, que combina un cliente de BitTorrent con navegación web baseada no Internet Explorer para permitir a busca simultánea en varias webs en busca de torrents, descargas directas e contidos en streaming, facilitando as descargas a través de Google, Jamendo, YouTube, Legaltorrents e Mininova, así coma outros buscadores.
Pump explora automaticamente as webs en busca de ficheiros torrent e contidos descargables directamente, polo que se podería comparar ao comportamento que o reprodutor Songbird ten coas ligazóns MP3. Tamén permite a subscrición doada a blogs e podcasts, compartir contidos a través da Rede, reproducir ficheiros multimedia (facendo uso dos filtros do Reprodutor Multimedia de Windows, do VLC ou mesmo de Quicktime segundo proceda), organizar os contidos en listaxes de reprodución e mesmo sincronizar ficheiros con dispositivos móbiles.
Pódese descargar de balde (previo rexistro) e polo momento só ten versión para Windows.