Seresco celebra o 50 aniversario da súa actividade en Galicia
mércores, 13 de setembro do 2023
Seresco,
compañía española especializada en solucións tecnolóxicas e
transformación dixital de empresas e organismos públicos, conmemora
estes días o 50 aniversario da súa actividade no mercado galego. A
empresa celebrará esta efeméride este venres 15 en Vigo na compaña
de AMTEGA, o Círculo de Empresarios de Galicia, a UVigo, o centro
atlantTIC ou Gradiant, entre outras empresas, entidades e centros
tecnolóxicos da nosa terra.
Fundada
en Asturias en 1969, abriu as portas da súa sede en Vigo no ano
1973, convertendo a Galicia na primeira delegación da tecnolóxica
decana a nivel nacional. Ao longo destes 50 anos, Galicia e Seresco
creceron da man e evolucionado grazas ao desenvolvemento tecnolóxico.
No ano 1977, a compañía abriu unha oficina na Coruña, extinta a
día de hoxe, e un centro de formación en Vigo, o cal, segundo
lembra a propia compañía, “converteuse no primeiro espazo
educativo no que cursar unha titulación superior en Informática na
comunidade”. Estivo en activo ata principios dos anos 2000.
“Para
nós Galicia supón unha praza clave”, explican dende a empresa,
poñendo o foco no papel que xoga a sede galega de Seresco como
“motor de cambio e centro de innovación para proxectos de carácter
nacional e internacional, xa que, desde os comezos en Galicia,
Seresco forxou unha sólida relación co tecido empresarial da zona,
entre o que destaca por riba dos demais o sector primario”. Dende
Galicia, sinalan, “levamos a cabo grandes innovacións en materias
como a agricultura de precisión e a dixitalización de procesos, o
que permite ás empresas, autónomos ou pemes realizar o seu traballo
dunha maneira máis sinxela”. Neste punto Seresco destaca a súa
“ampla colaboración da administración pública galega”, quen
confiou á tecnolóxica asturiana proxectos e iniciativas “de gran
calado”, sendo algunhas adquiridas e empregadas polo Ministerio de
Agricultura e outras comunidades autónomas.
“Esta
sinerxía entre administracións e empresas locais”, engade a
compañía, “non sería posíbel sen os 70 traballadores cos que
conta Seresco en Galicia, comunidade que achega unha quinta parte da
facturación total da compañía, cuxa cifra anual situouse nos 34
millóns de euros en 2022”.
Un
evento para conmemorar 50 anos vinculados a Galicia
A
tecnolóxica asturiana elixiu o Palacio da Oliva, en Vigo, como
emprazamento para celebrar esta efeméride. Será alí onde o
vindeiro venres 15 de setembro reúnanse os traballadores da compañía
xunto co comité directivo, o consello de administración e os
clientes da organización.
Conducido
pola xornalista galega Gladys Vázquez, o evento reunirá na mesa de
debate Desafíos e oportunidades na transformación dixital en
Galicia a varios directivos de empresas e da administración
pública, entre os que se atopan, Julián Cerviño Iglesia, director
da Axencia para a Modernización Tecnolóxica de Galicia na Xunta de
Galicia (AMTEGA); María Borrás, vicepresidenta do Círculo de
Empresarios de Galicia, Martín Llamas, catedrático da Universidade
de Vigo e director de atlantTIC, así como Luis Pérez-Freire,
director xeral do Centro Tecnolóxico Gradiant.
Un
ano histórico para Seresco
A
tecnolóxica, que empezou a cotizar en BME Growth en 2022, rexistrou
un aumento da facturación en todas as actividades, sendo as áreas
de nómina e recursos humanos, grazas aos servizos de outsourcing
de nómina, os que congregan maior representatividade no volume
de negocio anual.
Estas
cifras achegan a Seresco aos obxectivos de negocio marcados, cuxa
cifra de facturación sitúase próxima aos 70 millóns de euros en
2025, o que supoñerá duplicar o volume de negocio respecto a 2021.
O plan tamén recolle elevar o EBITDA axustado dos dos 3,1 millóns
de entón ata os 10,5 nun horizonte temporal de dous anos.
A
compañía posúe unha carteira de máis de 2.200 clientes nacionais
e internacionais e un investimento medio do 12% do negocio en I D i.
Seresco ten centros de servizos en Madrid, Barcelona, Oviedo, Vigo,
Porto e Lisboa. Fóra da península está presente en Latinoamérica
e conta con preto de 800 empregados.