Streamlabs lanza un editor de podcasts

xoves, 15 de xuño do 2023 Marcus Fernández

Streamlabs, a marca de Logitech que desenvolve unha das aplicacións máis populares para realizar transmisións en directo a través de plataformas como Twitch ou YouTube, quere contribuír tamén ao emerxente mercado do podcasting e anuncia o Streamlabs Podcast Editor, unha ferramenta para editar podcasts e entrevistas para levar este material dun xeito rápido, dinámico e eficiente ás diferentes plataformas nas que pode publicarse o material.
Cómpre salientar que cando falamos de podcasts, non están a entender o formato tradicional baseado no audio, senón na súa versión audiovisual, que normalmente inclúe aos interlocutores falando, así como algunha outra información audiovisual de apoio, aínda que normalmente o vídeo é un simple accesorio.
Para axilizar a edición dos podcasts o novo editor conta cun sistema de transcrición, que permite a edición baseada no texto (de xeito que se borramos unha frase de texto tamén borramos o seu vídeo correspondente) e tamén facilitan a eliminación de silencios e titubeos. Facilita tamén a integración de vídeos e fotografías, para que o contido sexa máis atractivo visualmente e, como colofón, permite optimizar o contido para a súa publicación nas diferentes plataformas (TikTok, YouTube, Facebook, iTunes, Instagram, Twitter, LinkedIn...).
Este editor é de balde con bastantes limitacións (só permite 1 horas de gravación ao mes e conta con 15 GB de almacenamento, incluíndo marca de auga de Streamlabs nos vídeos exportados), que conta cunha versión Pro por 12 dólares/mes (que permite vídeos de até 2 horas, até 40 horas ao mes, 250 GB de almacenamento e opción de exportación de subtítulos), aínda que non serán poucos os que opten por facerse con Streamlabs Ultra, plan que custa 19 euros/mes ou 149 euros/ano, e inclúe 8 aplicacións para creadores, polo que é un investimento moito máis atractivo.

PUBLICIDADE