Tecnoloxía galega para dixitalizar a imaxe médica en Cantabria

A empresa galega Bahía Software, con 10 anos de experiencia no sector da Consultaría e Tecnoloxías da Información, vén de ser a adxudicataria dun concurso público para desenvolver e consolidar o plano de dixitalización da imaxe médica destinada a todos os centros hospitalarios do Servizo Cántabro de Saúde.
A implantación deste proxecto, para o que conta cun investimento de 116.450 euros, executarase ao longo de 16 meses e permitirá que todos os resultados de probas médicas, como por exemplo as radiografías, pasen ao formato dixital nos complexos sanitarios cántabros.
Asemade, tamén se activará o PACS Corporativo como “respaldo” para a central de datos sanitarios da comunidade, “sentando”, tal e como veñen de afirmar os seus responsables, “ un importante punto de inflexión na Historia Clínica Electrónica de Cantabria”.
Segundo declaracións de Gustavo Gómez, xerente da Área Comercial de Bahía Software “o desenvolvemento deste proxecto permitirá un importante aforro de custes materiais, como por exemplo, película, líquidos de revelado… minimizando o gasto económico e reducindo residuos, para así contribuír co reforzamento do compromiso medioambiental”.
Por outra banda, este sistema pon de manifesto unha maior accesibilidade ao poder consultar todas as probas médicas dende calquera punto da rede hospitalaria, potenciando a telemediciña, o traballo en rede dos profesionais e a mellora na atención ao paciente.

Fases de implantación
A implantación deste plan de dixitalización da imaxe médica estrutúrase ao redor de dúas fases, iniciándose cun período de consultaría (por parte de Bahía Software) na que se visitarán cada un dos centros hospitalarios para determinar todas as necesidades individuais e poder así adaptar o proxecto especificamente a cada centro. A continuación, a entidade procederá á configuración dos aparatos e software para poder executar a implantación acompañada dun servizo de soporte do sistema, que atende tanto a usuarios finais como aos técnicos dos centros hospitalarios, ademais da formación, mantemento e actualización necesarios en cada momento.

Galicia, consolida a súa dixitalización ao 100%
No caso da Comunidade Autónoma Galega, Bahía Software comezou no primeiro trimestre do año 2005 a fase de execución deste mesmo proxecto tras culminarse con éxito o período de consultaría e definición das necesidades. Dende o pasado febreiro de 2008, cunha duración de tres anos e un investimento de 440.000€, o SERGAS adxudicou o servizo de implantación, soporte, formación e mantemento dos sistemas de imaxe médica instalados nos seus centros hospitalarios dando inicio a unha nova fase de consolidación do proxecto.