Telefónica e Yoigo discuten polo uso da rede HSPA+ coas novas tarifas

A comezos do pasado mes de xuño, Yoigo sorprendía a clientes e non clientes cunha atractiva oferta de chamadas nacionais sen límite de minutos e ata 1 Gb de transferencia de datos, entre outras vantaxes, que fixo chamar Tarifa infinita, e que por 30 euros ó mes + IVE tiña previsto acaparar usuarios a esgalla das 3 operadoras nacionais principais.
Porén pouco lle durou a alegría á operadora filial de TeliaSonera, que nos últimos días vén de enfrontarse con Movistar polo uso que se está a facer das redes móbiles HSPA+ coa devandita tarifa.
Segundo lemos en CincoDías.com, Telefónica enviou un requirimento notarial no que lle esixía a Yoigo que cumprise estritamente o contrato asinado por ambas partes no uso das infraestruturas móbiles, advertindo que mesmo se podía cortar o servizo con esta tecnoloxía se persistía o presunto incumprimento contractual.
Segundo parece, coa adopción destas tarifas por parte dun número elevado de clientes, estase a producir unha sobrecarga nas redes de HSPA+ e dende Telefónica ven necesario “sentarse a renegociar o contrato para dar máis capacidade á rede”.
Pola súa parte, a cuarta operadora nacional de telefonía, Yoigo, sinala que a discusión vén dada pola dúbida de se a tecnoloxía HSPA+ está incluída no contrato con Telefónica ou non, e neste senso indican que si, “ao ser unha evolución máis avanzada da tecnoloxía HSPA”.
Os ánimos están acendidos, e Yoigo, que considera “unha medida durísima” o corte do servizo co que “ameaza” Telefónica, mesmo decidiu poñer o caso en coñecemento da Comisión do Mercado das Telecomunicacións (CMT) e pediu unha resolución preventiva.
Esta autoridade reguladora, que ten previsto analizar a disputa nos vindeiros días, vai instar a ámbalas dúas partes a tratar de chegar a un acordo, e no caso de non arranxar o altercado, verase na obriga de intervir para tomar unha decisión que prexudique o menos posible aos clientes das dúas compañías.