Telefónica inviste 8 millóns para levar fibra até 60.000 fogares do núcleo urbano de Vigo
venres, 21 de xuño do 2013
O director de Telefónica
en Galicia, Manuel Alonso, reuniuse co alcalde de Vigo, Abel
Caballero, para presentarlle os plans de despregamento na cidade
galega de fibra de telecomunicacións até o fogar (tecnoloxía FTTH,
Fiber To The Home). Os traballos para instalar a nova rede,
que xa están en marcha), suporán, en palabras de Alonso, “un
investimento de 8 millóns de euros, a xeración de 100 empregos e
o subministro a máis de 60.000 fogares do núcleo urbano da
tecnoloxía máis avanzada que existe actualmente no mercado para
transmisión de datos”. En total, engadiu, despregaranse máis
de 70.000 quilómetros de fibra por toda a cidade.
Na súa conversa tamén
se tratou a cuestión do traballo feito até o de agora, que xa
rematou nalgunhas áreas, como por exemplo no polígono do Caramuxo,
onde Telefónica dará a coñecer as vantaxes que a devandita
tecnoloxía achega para as empresas alí emprazadas (o acto
desenvolverase o xoves 27 de xuño no Hotel Hesperia).
Alonso e Caballero
acordaron tamén establecer mecanismos de coordinación entre
Telefónica e o Concello para que as obras molesten o menos posible
aos cidadáns. De feito, a operadora sinalou que está a darlle
prioridade ao despregamento a través das conducións xa existentes,
para reducir desta maneira ao máximo o traballo a pé de rúa.
Segundo engadiu, a extensión de fibra óptica até o fogar
prolongarase ao longo das vindeiras semanas, “convertendo a Vigo
nunha das primeiras cidades de España en dispor desta infraestrutura
que é quen de acadar velocidades
infinitas de transmisión de datos, e que permitirá aos vigueses non
só dispor dos servizos máis avanzados que se comercializan
actualmente e dos que poidan desenvolverse nas próximas décadas”.