Telegram estrea chats de voz

mércores, 23 de decembro do 2020 Marcus Fernández

A aplicación de mensaxería instantánea Telegram non cesa de medrar en prestacións, e desta volta tocoulle mellorar o funcionamento dos grupos de chat, que estrean chats de voz, conferencias en formato sonoro persistentes que permiten aos membros entrar e saír cando queiran, de xeito que poden manterse en paralelo coas comunicacións existentes nos grupos de Telegram para contar cunha capa de charlas efémeras en directo.
Estes chats de voz non son exactamente chamadas grupais, aínda que poden empregarse dese xeito, pois ofrecen unha maior flexibilidade. Cando entremos nun grupo de Telegram veremos se está activo un chat de voz e os seus participantes, para decidir así se queremos participar na conversa, o que permitirá continuar co uso da aplicación de mensaxería mentres a conversa de voz ten lugar en segundo plano (o que en Android permite incluso saír da aplicación e manter o chat de voz como widget flotante.
Os novos chats de voz poden servir para pequenas conversas familiares ou para xuntar a milleiros de participantes, podendo crealos calquera administrador dun grupo de chat, polo que é de agardar que nas vindeiras semanas os usuarios exploren intensamente a nova funcionalidade que rematará tendo o uso habitual que os usuarios decidan dun xeito práctico.

PUBLICIDADE