Telegram estrea videochamadas

venres, 14 de agosto do 2020 Marcus Fernández

En Telegram están a celebrar hoxe o sétimo aniversario da aplicación de mensaxería que presume de ter superado os 400 millóns de usuarios e figurar entre as 10 aplicacións máis descargas e empregadas a nivel mundial, e que por fin incorpora unha funcionalidade coa que contan practicamente todos os seus competidores dende hai moito: as videochamadas.
Esta nova funcionalidade de Telegram está agora dispoñible para iOS e Android nunha versión alfa, permitindo xa iniciar videochamadas dende a páxina do perfil dos contactos, acender ou apagar o vídeo cando se queira durante as chamadas de voz e, como o reto de contidos de vídeo en Telegram permiten o modo imaxe e imaxe, de xeito que permite navegar por conversas e facer outras tarefas mentres se mantén o contacto visual.
Dende Telegram insisten no feito de que as súas videochamadas están protexidas por cifrado de extremo a extremo, confirmando a conexión comparando 4 emoticonas que aparecen en pantalla para ambos participantes na chamada (se coinciden, a chamada está protexida).
Esta prestación está aínda en pleno desenvolvemento e confían en que en futuras versións reciba melloras como as videochamadas en grupo.

JPEG - 119.9 KB
As videochamadas chegan a Telegram en versión alfa e con cifrado de extremo a extremo

PUBLICIDADE