UCGAL insta aos compradores do WebTV de Blusens a reclamar a devolución dos cartos pagados

Na páxina de Facebook do WebTV recoñecen que teñen os seus servidores desactivados para impedir o correcto funcionamento do seu produto

Nos últimos días causou bastante rebumbio a retirada do mercado do WebTV de Blusens, produto actualmente distribuído por Magna Technology e que podiamos atopar nas principais canles comerciais de electrónica de consumo en España (dende Media Markt ata Alcampo). Ao parecer teríanse comisado máis de 4.000 receptores en 7 rexistros en naves industriais e domicilios en Compostela, que en calquera caso xa non poderían empregase para vulnerar a propiedade intelectual xa que deixaron de operar a semana pasada xa que os seus servidores na Internet están inactivos, tal e como recoñecen na páxina de Facebook do produto.
Esta situación irregular levou á Unión de Consumidores de Galicia (UCGAL) a realizar un comunicado no que aseguran que, en vista do acontecido, «existe unha falta de conformidade do produto de acordo ao establecido na normativa que regular as garantías de bens de consumo». Tamén destacan que os consumidores non tiñan xeito de saber que o WebTV incumpría a normativa vixente e era susceptible de perder o servizo ofrecido, e dado que a reparación ou substitución do reprodutor non é unha solución viable, UCGAL considera que os afectados pode reclamar a devolución dos cartos pagados polo dispositivo no seu momento. Instan así a acudir ás autoridades de consumo para resolver dúbidas sobre o tema e presentar a correspondente reclamación.
UCGAL tamén solicitará a intervención da fiscalía ao considerar que o caso afecta aos intereses económicos dunha pluralidade indeterminada de consumidores.