Un enxeñeiro informático galego crea unha aplicación para xerar hologramas 3D co smartphone

Aínda que nos últimos anos tendemos a confundir as imaxes tridimensionais coas imaxes esteroscópicas, hai bastante diferenza entre achegar imaxes con profundidade presentando unha imaxe diferente para cada ollo e crear sistemas que consigan unha boa sensación de volume grazas a que a imaxe cambia conforme muda o punto de vista do usuario, o que resulta máis que evidente cos avances en cascos de realidade aumentada, pero historicamente puideron conseguirse efectos semellantes sen o uso de lentes, mediante holografía, unha técnica normalmente moi complicada de levar ao mundo real, e que habitualmente só vemos en espectáculos e museos, e que grazas a unha aplicación móbil desenvolvida polo graduado en Enxeñaría Informática pola UDC, Pablo Fernández, podemos agora reproducila de xeito doado valéndonos dun smartphone, tesoiras, cinta adhesiva e unha folla de plástico.
Seguindo unha guía podemos recortar unha folla de plástico para darlle forma piramidal, e así colocala sobre a pantalla do noso smartphone, creando así unha especie de proxector de hologramas. O reto sería agora conseguir as imaxes que habería que combinar dentro da pirámide para crear a sensación tridimensional, e para iso temos a aplicación para Android Hologramas: Experiencias 3D, que podemos descargar de balde de Google Play, e que permítenos ver como da pantalla do teléfono saen fogos artificiais, percorrer o espazo na procura de aventuras, facerlle preguntas a unha clásica bóla máxica, admirar os planetas do sistema solar e incluso coidar dunha mascota holográfica. A aplicación irase actualizando para realizar novas experiencias, demostrando que en moitos casos podemos gozar de impresionantes efectos visuais sen ter que empregar solucións afastadas do noso peto (o que pode lembrarnos, por exemplo, ao célebre cartón de Google).

Vídeo no que podemos ver en vivo o funcionamento de Hologramas: Experiencias 3D