Un obradoiro no Campus de Pontevedra afondará no uso educativo dos videoxogos

A Aula Crea do Campus de Pontevedra vén de abrir a inscrición para un interesante obradoiro titulado Gañando o futuro que pretende achegar aos participantes ao videoxogo como un medio de expresión e unha ferramenta educativa para que o futuro profesorado e calquera persoa interesada poida afondar no seu coñecemento e nos criterios para a súa boa escolla e uso, así como para deseñar propostas de aprendizaxe dende o xogo.
Esta actividade de balde, organizada coa colaboración da Fundación do Museo do Videoxogo de Galicia, desenvolverase entre o 16 de setembro e o 7 de outubro, e tras introducir aos futuros docentes no uso dos videoxogos como ferramenta educativa, abordará temas como o videoxogo como medio de expresión cultural; a necesidade de adaptarse ás motivacións do alumnado e á súa realidade social dende o punto de vista curricular e creativo; o método de escolla de videoxogos (con exemplos de títulos interesantes); as virtudes dos videoxogos e os posibles prexuízos derivados dun mal uso; os distintos ámbitos que tocan os videoxogos; e incluso a situación da industria galega do videoxogo.